- విద్యార్థుల్లో దాగి ఉన్న సృజనాత్మకతను వెలికితీయాలి: డీఈవో వై. తిరుపతిరావు
కరీంనగర్‌, అక్టోబర్‌ 27 (చైతన్యగళం):
కళల ద్వారా సామాజిక రుగ్మతలపై అవగాహన కల్పించి, వాటిని రూపుమాపేందుకు కృషి చేయవచ్చని జిల్లా విద్యాశాఖ అధికారి వై. తిరుపతిరావు అన్నారు. ప్రపంచ జనాభా దినోత్సవాన్ని పురస్కరించుకుని రాష్ట్ర విద్యా పరిశోధన, శిక్షణ మండలి (ఎస్‌సీఈఆర్‌టీ), జిల్లా విద్యాశాఖ ఆధ్వర్యంలో ప్రభుత్వ పాఠశాలల విద్యార్థులకు నిర్వహించిన పాత్రధారణ పోటీలను ఆయన ప్రారంభించారు.
ఈ సందర్భంగా తిరుపతిరావు మాట్లాడుతూ విద్యార్థుల్లో అపారమైన సృజనాత్మకత దాగి ఉంటుందని, ఉపాధ్యాయులు నిరంతరం వారిని గమనిస్తూ అంతర్గత ప్రతిభను వెలికితీయాలని సూచించారు. విద్యార్థులను ప్రోత్సహించడం ద్వారా వారి సృజనాత్మక ఆలోచనలకు పదును పెట్టవచ్చని తెలిపారు. బాల్యదశ నుంచే విద్యార్థులకు వివిధ సామాజిక సమస్యలపై అవగాహన కల్పించాల్సిన అవసరం ఉందన్నారు.
ఆరోగ్యం, మానసిక ఆరోగ్యం, నైతిక విలువలు, లింగ సమానత్వం, మత్తు పదార్థాలకు దూరంగా ఉండటం, శారీరక, మానసిక భద్రత, సామాజిక మాధ్యమాల వినియోగంలో తీసుకోవాల్సిన జాగ్రత్తలు వంటి అంశాలపై విద్యార్థులకు అవగాహన ఉండాలని పేర్కొన్నారు. ఈ అంశాలను సులభంగా అర్థమయ్యేలా వివరించేందుకు ఎస్‌సీఈఆర్‌టీ ఆధ్వర్యంలో పాత్రధారణ పోటీలు నిర్వహిస్తున్నట్లు తెలిపారు. ఇలాంటి కార్యక్రమాలను విస్తృతంగా నిర్వహించి విద్యార్థుల్లో సామాజిక బాధ్యతను పెంపొందించాలని సూచించారు.
విద్యార్థులు సామాజిక సమస్యల పట్ల అప్రమత్తంగా ఉంటూ తగిన జాగ్రత్తలు పాటించాలని, ఉపాధ్యాయులు వారిని నిరంతరం ప్రోత్సహిస్తూ ప్రతిభను వెలికితీయాలని డీఈవో కోరారు. పోటీల అనంతరం ప్రథమ, ద్వితీయ, తృతీయ స్థానాల్లో నిలిచిన విద్యార్థులకు బహుమతులు ప్రదానం చేశారు.
ఈ కార్యక్రమంలో విద్యాశాఖ సెక్టోరల్‌ అధికారులు కర్ర అశోక్‌రెడ్డి, మిల్కూరి శ్రీనివాస్‌, సైన్స్‌ అధికారి చాడ జయపాల్‌రెడ్డి, న్యాయనిర్ణేతలు ఖాజా మంజూర్‌ అలీ, గాజుల రవీందర్‌ తదితరులు పాల్గొన్నారు.
