సిద్దిపేట, అక్టోబర్ 16 (చైతన్యగళం):
ప్రధాని మోదీ పిలుపుతో ప్రజలంతా ఏకమై కరోనా మహమ్మారిని ఎదుర్కొన్నట్లుగానే, ముఖ్యమంత్రి రేవంత్‌రెడ్డి పిలుపుతో ఎల్‌నినో ప్రభావాన్ని ఎదుర్కొనేందుకు ప్రజలు, రైతులు ప్రభుత్వానికి సహకరించాలని రాష్ట్ర కార్మిక, ఉపాధి కల్పన, గనుల శాఖ మంత్రి గడ్డం వివేక్ వెంకటస్వామి కోరారు. శుక్రవారం దుబ్బాక నియోజకవర్గ పరిధిలోని దుబ్బాక, భూంపల్లి-అక్బర్‌పేట, మీర్దొడ్డి, రాయపోల్, దౌల్తాబాద్, తొగుట మండలాలకు చెందిన 2,111 మంది రెండు పడక గదుల ఇళ్ల లబ్ధిదారులకు పట్టాలు, 179 మంది కళ్యాణలక్ష్మి, షాదీ ముబారక్ లబ్ధిదారులకు రూ.1.79 కోట్ల విలువైన చెక్కులను దుబ్బాక ఎమ్మెల్యే కొత్త ప్రభాకర్‌రెడ్డితో కలిసి మంత్రి పంపిణీ చేశారు.
ఈ సందర్భంగా మంత్రి మాట్లాడుతూ రాష్ట్రంలో ఎవరూ గుడిసెల్లో నివసించకూడదనే లక్ష్యంతో ముఖ్యమంత్రి రేవంత్‌రెడ్డి ఇందిరమ్మ ఇళ్ల పథకాన్ని ప్రవేశపెట్టారని తెలిపారు. సిద్దిపేట జిల్లాలో ఇప్పటికే 12 వేల ఇందిరమ్మ ఇళ్లు మంజూరు చేశామని, మరో మూడు వేల ఇళ్లు మంజూరు చేయనున్నామని చెప్పారు. త్వరలో రెండో విడత లబ్ధిదారుల ఎంపిక పూర్తవుతుందన్నారు. ప్రభుత్వం ఆరు గ్యారంటీలను అమలు చేస్తూ పేదలకు అండగా నిలుస్తోందని పేర్కొన్నారు. కొత్త రేషన్ కార్డులు పంపిణీ చేశామని, త్వరలో నూతన ఆసరా పింఛన్లు అందించనున్నట్లు తెలిపారు. రాష్ట్రంలో రూ.23 వేల కోట్లతో రైతు రుణమాఫీ చేసినట్లు వెల్లడించారు.
ప్రస్తుతం దేశవ్యాప్తంగా ఎల్‌నినో ప్రభావం ఉందని, వర్షాభావ పరిస్థితుల నేపథ్యంలో రైతులు వ్యవసాయ అధికారుల సూచనలు పాటించాలని, వరి సాగు చేయవద్దని మంత్రి సూచించారు. ఎల్‌నినోను ఎదుర్కొనేందుకు రాష్ట్ర ప్రభుత్వం ప్రత్యేక ఉపసంఘాన్ని ఏర్పాటు చేసిందని తెలిపారు. రిజర్వాయర్లలోని నీటిని తాగునీటి అవసరాల కోసం జాగ్రత్తగా వినియోగించుకోవాలని కోరారు. గత ఏడాది ఇదే సమయంలో 15 వేల మెగావాట్లుగా ఉన్న విద్యుత్ వినియోగం ప్రస్తుతం 20 వేల మెగావాట్లకు చేరిందని, రాష్ట్రవ్యాప్తంగా బోర్లకు తొమ్మిదిన్నర గంటల విద్యుత్ సరఫరా చేస్తున్నట్లు వివరించారు.
దుబ్బాక ఎమ్మెల్యే కొత్త ప్రభాకర్‌రెడ్డి మాట్లాడుతూ పెండింగ్‌లో ఉన్న రెండు పడక గదుల ఇళ్లను అర్హులైన స్థానిక లబ్ధిదారులకు పంపిణీ చేస్తున్నామని తెలిపారు. ఇతర ప్రాంతాలకు చెందిన అనర్హులు ఇళ్లలో ఉంటే వారిని తొలగించి స్థానిక అర్హులకు కేటాయించాలని కోరారు. నియోజకవర్గంలో పెండింగ్‌లో ఉన్న అభివృద్ధి పనులను త్వరగా పూర్తి చేయాలని సూచించారు. ఎల్‌నినో ప్రభావంతో వర్షాభావ పరిస్థితులు నెలకొని రైతులు ఇబ్బందులు పడుతున్నారని, చివరి దశలో ఉన్న పంటలను కాపాడేందుకు సాగునీరు విడుదల చేయడంతో పాటు తగినంత విద్యుత్ సరఫరా చేయాలని కోరారు.
జిల్లా కలెక్టర్ కె. హైమావతి మాట్లాడుతూ కళ్యాణలక్ష్మి, షాదీ ముబారక్, కొత్త రేషన్ కార్డులు, 200 యూనిట్ల ఉచిత విద్యుత్, సబ్సిడీ గ్యాస్, మహిళలకు ఆర్టీసీ బస్సుల్లో ఉచిత ప్రయాణం వంటి పథకాలను ప్రభుత్వం అమలు చేస్తోందని తెలిపారు. లబ్ధిదారులు ఈ పథకాలను సద్వినియోగం చేసుకోవాలని సూచించారు. దుబ్బాకలో యంగ్ ఇండియా సమీకృత గురుకుల పాఠశాలను ప్రభుత్వం ప్రారంభించనుందని, త్వరలో ప్రభుత్వ పాఠశాలల్లో విద్యార్థులకు అల్పాహార కార్యక్రమాన్ని కూడా ప్రారంభించనున్నట్లు వెల్లడించారు.
ఈ కార్యక్రమంలో రాష్ట్ర పద్మశాలి కార్పొరేషన్ చైర్మన్ గూడూరి శ్రీనివాస్, దుబ్బాక మున్సిపల్ చైర్‌పర్సన్ శ్రీరాం సంగీత, సిద్దిపేట ఆర్డీఓ సదానందం, వివిధ శాఖల అధికారులు, లబ్ధిదారులు పాల్గొన్నారు.
