- 38వ డివిజన్‌లో రూ.24 లక్షలతో సీసీ రోడ్డు నిర్మాణానికి శంకుస్థాపన – నగర మేయర్‌ కొలగాని శ్రీనివాస్‌
కరీంనగర్‌, అక్టోబర్ 16 (చైతన్యగళం):
పార్టీలకు అతీతంగా నగరంలోని అన్ని డివిజన్లను అభివృద్ధి చేయడమే తమ పాలకవర్గం లక్ష్యమని కరీంనగర్‌ నగర మేయర్‌ కొలగాని శ్రీనివాస్‌ అన్నారు. ముఖ్యంగా విలీన గ్రామాలు, శివారు ప్రాంతాల్లో మౌలిక సదుపాయాల కల్పనకు ప్రాధాన్యమిస్తున్నామని తెలిపారు.
నగరపాలక సంస్థ అభివృద్ధి కార్యక్రమాల్లో భాగంగా శుక్రవారం 38వ డివిజన్‌లో మేయర్‌ కొలగాని శ్రీనివాస్‌, ఉప మేయర్‌ యాదగిరి సునీల్‌రావుతో కలిసి పర్యటించారు. అమీరనగర్‌లో నగరపాలక సంస్థ నిధులు రూ.24 లక్షలతో చేపట్టనున్న సీసీ రోడ్డు నిర్మాణ పనులకు భూమిపూజ చేశారు. అనంతరం డివిజన్‌లోని పలు ప్రాంతాలను సందర్శించి స్థానిక సమస్యలను పరిశీలించారు. చేపట్టిన అభివృద్ధి పనులను వేగంగా, నాణ్యతతో పూర్తి చేయాలని అధికారులకు, కాంట్రాక్టర్లకు సూచించారు.
అనంతరం డివిజన్‌లోని దుర్గామాత మండపాన్ని సందర్శించిన మేయర్‌, ఉప మేయర్‌ అమ్మవారిని దర్శించుకుని ప్రత్యేక పూజలు నిర్వహించారు. మండప నిర్వాహకులు వారికి శాలువాలతో సత్కరించారు.
రూ.80 కోట్ల యూఐడీఎఫ్‌ నిధులతో అభివృద్ధి పనులు
ఈ సందర్భంగా మేయర్‌ మాట్లాడుతూ కేంద్ర హోంశాఖ సహాయ మంత్రి బండి సంజయ్‌కుమార్‌ సహకారంతో నగరంలోని వివిధ డివిజన్లలో పెద్ద ఎత్తున అభివృద్ధి పనులు చేపడుతున్నామని తెలిపారు. 38వ డివిజన్‌ కార్పొరేటర్‌ తమ దృష్టికి తీసుకొచ్చిన సమస్యల పరిష్కారానికి నిధులు కేటాయించి పనులు చేపడుతున్నట్లు చెప్పారు. ఇప్పటికే యూఐడీఎఫ్‌ నిధులతో పలు అభివృద్ధి పనులు చేపట్టి ప్రజలకు అవసరమైన మౌలిక సదుపాయాలు కల్పిస్తున్నామని పేర్కొన్నారు.
కరీంనగర్‌ను అర్బన్‌ ఛాలెంజ్‌ ఫండ్‌ పథకంలో చేర్చి రూ.840 కోట్ల నిధులు తీసుకొచ్చామని, త్వరలోనే పనులు ప్రారంభించేందుకు చర్యలు తీసుకుంటున్నామని తెలిపారు. పాలకవర్గం ఏర్పడిన తర్వాత ప్రజలకు ఇచ్చిన హామీ మేరకు గత ఏడు నెలల్లో కోట్లాది రూపాయలతో వివిధ డివిజన్లలో అభివృద్ధి పనులు చేపట్టినట్లు వెల్లడించారు.
బండి సంజయ్‌కుమార్‌ సహకారంతో రూ.50 కోట్ల యూఐడీఎఫ్‌ నిధులతో పనులు చేపట్టామని, మరో రూ.30 కోట్ల నిధులు సమకూర్చుకుని మరిన్ని అభివృద్ధి కార్యక్రమాలు చేపడుతున్నామని వివరించారు. కరీంనగర్‌ నగరపాలక సంస్థను అన్ని రంగాల్లో అభివృద్ధి చేసి ఆదర్శ నగరంగా తీర్చిదిద్దుతామని అన్నారు.
డంపింగ్‌ యార్డు సమస్యకు శాశ్వత పరిష్కారం
నగరంలో ప్రధాన సమస్యగా ఉన్న డంపింగ్‌ యార్డు సమస్యకు త్వరలోనే శాశ్వత పరిష్కారం చూపిస్తామని మేయర్‌ స్పష్టం చేశారు. స్వచ్ఛ భారత్‌ మిషన్‌ కింద రూ.17 కోట్లతో వ్యర్థాల జీవశాస్త్ర ఆధారిత శుద్ధి ప్రక్రియ పనులకు నిధులు కేటాయించామని, త్వరలో పనులు ప్రారంభించి స్థానిక ప్రజల ఇబ్బందులను తొలగిస్తామని తెలిపారు.
ఈ కార్యక్రమంలో కార్పొరేటర్లు దేవసాని సరస్వతి సత్యనారాయణ, మాసం గణేష్‌, కేఏపీపీ చంద్రతో పాటు అధికారులు, సిబ్బంది పాల్గొన్నారు.
