- సాగు ఖర్చులు తగ్గించుకోవచ్చు.. సహజ వనరులను వినియోగించుకోవాలి: మండల వ్యవసాయ అధికారి వేల్పుల పూజ
హుస్నాబాద్‌, అక్టోబర్‌ 28 (చైతన్యగళం):
ప్రకృతి వ్యవసాయ పద్ధతులను అవలంబించడం ద్వారా సాగు ఖర్చులను తగ్గించుకోవడంతోపాటు నేల ఆరోగ్యాన్ని పరిరక్షించుకోవచ్చని మండల వ్యవసాయ అధికారి వేల్పుల పూజ సూచించారు. బుధవారం బంజేరుపల్లి గ్రామంలో రైతులకు ప్రకృతి వ్యవసాయంపై అవగాహన కల్పించారు. ఈ సందర్భంగా సహజ వనరుల వినియోగం, నేల సారాన్ని పెంపొందించే పద్ధతుల గురించి వివరించారు.
జీవామృతం, ఘన జీవామృతం, బీజామృతం, వేప ఆధారిత కషాయాల వినియోగంతోపాటు పశువుల ఎరువు, పంట అవశేషాలు, పచ్చిరొట్ట ఎరువులను ఉపయోగించడం ద్వారా నేలలో సేంద్రియ పదార్థాన్ని పెంచుకోవచ్చని పూజ తెలిపారు. అంతర పంటల సాగు, పంట మార్పిడి వంటి పద్ధతులు కూడా నేల ఆరోగ్య పరిరక్షణకు దోహదపడతాయని వివరించారు.
రసాయన ఎరువులు, పురుగుమందులపై ఆధారపడటాన్ని క్రమంగా తగ్గిస్తూ, స్థానికంగా అందుబాటులో ఉన్న సహజ వనరులను సద్వినియోగం చేసుకోవాలని రైతులకు సూచించారు. ప్రకృతి వ్యవసాయ పద్ధతులు నేలలో సూక్ష్మజీవుల కార్యకలాపాలను ప్రోత్సహించడంతోపాటు తేమను నిలుపుకొనే సామర్థ్యాన్ని మెరుగుపరచడంలో తోడ్పడతాయని పేర్కొన్నారు.
రైతులు తొలుత తమ పొలాల్లో కొంత విస్తీర్ణంలో ప్రకృతి వ్యవసాయ పద్ధతులను అమలు చేసి, ఫలితాలు, అనుభవాలను బట్టి క్రమంగా సాగు విస్తీర్ణాన్ని పెంచుకోవాలని సూచించారు. ఈ విధానాలపై అవగాహన పెంపొందించుకొని, నేల ఆరోగ్యాన్ని కాపాడుకుంటూ స్థిరమైన వ్యవసాయం వైపు అడుగులు వేయాలని కోరారు.
ఈ కార్యక్రమంలో వ్యవసాయ విస్తరణ అధికారి విజయ్‌, ఎన్‌ఎంఎన్‌ఎఫ్‌ ఫీల్డ్‌ అసిస్టెంట్‌ ప్రశాంత్‌, గ్రామ సర్పంచ్‌, రైతులు రిక్కల రాజిరెడ్డి, బాణాల శంకర్‌రెడ్డి, నందరెడ్డి, ఇప్ప నారాయణ తదితరులు పాల్గొన్నారు.
