- రూ.3 కోట్లతో నగరవ్యాప్తంగా సౌకర్యాలు.. బతుకమ్మ పాయింట్లను పరిశీలించిన మేయర్ కొలగాని శ్రీనివాస్
కరీంనగర్, అక్టోబర్ 17 (చైతన్యగళం):
తెలంగాణ సంస్కృతి, సంప్రదాయాలకు ప్రతీకగా నిలిచే సద్దుల బతుకమ్మ వేడుకలతో పాటు దుర్గామాత విగ్రహాల నిమజ్జనాలను ప్రశాంతంగా, వైభవంగా నిర్వహించేందుకు కరీంనగర్ నగరపాలక సంస్థ ఆధ్వర్యంలో రూ.3 కోట్లతో విస్తృత ఏర్పాట్లు చేస్తున్నట్లు నగర మేయర్ కొలగాని శ్రీనివాస్ తెలిపారు. మహిళలు, భక్తులకు ఎలాంటి అసౌకర్యం కలగకుండా అన్ని సౌకర్యాలు కల్పిస్తున్నామని పేర్కొన్నారు.
ఈ నేపథ్యంలో శుక్రవారం మేయర్ కొలగాని శ్రీనివాస్, ఉప మేయర్ యాదగిరి సునీల్ రావు, నగరపాలక సంస్థ కమిషనర్ ప్రఫుల్ దేశాయ్, పలువురు కార్పొరేటర్లు, అధికారులతో కలిసి నగరంలోని వివిధ బతుకమ్మ వేడుకల ప్రదేశాలను సందర్శించి ఏర్పాట్లను పరిశీలించారు.
బతుకమ్మ పాయింట్ల వద్ద విస్తృత ఏర్పాట్లు
మానేరు డ్యామ్‌, మానేరు వాగు పరివాహక ప్రాంతాలతో పాటు మార్కండేయ నగర్, శివనగర్, సప్తగిరి కాలనీ, సీఎం పాయింట్, రాంచంపూర్, లేక్ పోలీస్ స్టేషన్, గౌతమీనగర్, వేదభవన్‌, కొత్తపల్లి, గోపాల్‌పూర్‌, దుర్షేడ్‌ తదితర ప్రాంతాల్లో చేపడుతున్న ఏర్పాట్లను మేయర్ పరిశీలించారు.
వేడుకల ప్రదేశాల్లో విద్యుత్‌ దీపాలంకరణ, ధ్వని వ్యవస్థ, రాతిపొడి పరచి చదును చేయడం, వేదికల ఏర్పాటు, బారికేడ్ల నిర్మాణం వంటి పనులను త్వరితగతిన పూర్తి చేయాలని అధికారులను ఆదేశించారు. మహిళలు బతుకమ్మ ఆడే ప్రదేశాల్లో భద్రతకు ప్రాధాన్యమివ్వాలని, తాగునీరు, పారిశుధ్యం వంటి సౌకర్యాలు సమృద్ధిగా కల్పించాలని సూచించారు.
నగరవ్యాప్తంగా 66 డివిజన్లలో ఎంపిక చేసిన బతుకమ్మ ప్రదేశాలతో పాటు నిమజ్జన ఘాట్ల వద్ద అవసరమైన సౌకర్యాలు కల్పిస్తున్నట్లు తెలిపారు. ప్రత్యేక పారిశుధ్య పనులతో పాటు గజ ఈతగాళ్లు, అధికారులు, సిబ్బందిని అందుబాటులో ఉంచి వేడుకలు సురక్షితంగా ముగిసేలా చర్యలు తీసుకుంటున్నామని వెల్లడించారు.
దుర్గామాత నిమజ్జనాలకు ప్రత్యేక ఏర్పాట్లు
కేంద్ర హోంశాఖ సహాయ మంత్రి బండి సంజయ్ కుమార్ సూచనల మేరకు ఈ నెల 21న నిర్వహించనున్న దుర్గామాత విగ్రహాల నిమజ్జనాలకు నగరపాలక సంస్థ ప్రత్యేక ఏర్పాట్లు చేస్తున్నట్లు మేయర్ తెలిపారు. మానకొండూర్‌, కొత్తపల్లి చెరువులను నిమజ్జన ప్రదేశాలుగా ఎంపిక చేసినట్లు పేర్కొన్నారు.
ఈ రెండు ప్రాంతాల్లో మెరుగైన విద్యుత్‌ దీపాలంకరణ, భారీ క్రేన్లు, తాగునీటి వసతి, గజ ఈతగాళ్ల ఏర్పాటు, ప్రత్యేక పారిశుధ్య నిర్వహణ చేపడుతున్నట్లు వివరించారు. దుర్గామాత మండపాల నిర్వాహకులు ఎంపిక చేసిన నిమజ్జన ప్రదేశాల్లోనే అమ్మవారి విగ్రహాలను నిమజ్జనం చేయాలని విజ్ఞప్తి చేశారు. నిమజ్జన వేడుకలు భక్తిశ్రద్ధలతో, ప్రశాంతంగా జరిగేలా నగరపాలక సంస్థకు సహకరించాలని కోరారు.
సమన్వయంతో వేడుకలను విజయవంతం చేయాలి
సద్దుల బతుకమ్మ తెలంగాణ ఆడపడుచుల ఆటపాటలకు, ఆత్మీయతకు ప్రతీక అని మేయర్ కొలగాని శ్రీనివాస్ పేర్కొన్నారు. మహిళలు కుటుంబ సభ్యులతో కలిసి ఉత్సాహంగా పండుగ జరుపుకునేలా అవసరమైన ఏర్పాట్లు చేస్తున్నామని తెలిపారు. పారిశుధ్య నిర్వహణను పకడ్బందీగా చేపట్టడంతో పాటు ప్రజలకు ఎలాంటి ఇబ్బందులు కలగకుండా అధికార యంత్రాంగం సమన్వయంతో పనిచేస్తోందన్నారు.
నగర ప్రజలందరికీ సద్దుల బతుకమ్మ శుభాకాంక్షలు తెలియజేస్తూ, బతుకమ్మ వేడుకలు, దుర్గామాత నిమజ్జనాలను ప్రశాంతంగా, సురక్షితంగా నిర్వహించుకోవాలని పిలుపునిచ్చారు.
ఈ కార్యక్రమంలో వ్యవసాయ మార్కెట్ కమిటీ చైర్మన్ ఆకుల నర్సయ్య, కార్పొరేటర్లు చొప్పరి జయశ్రీ వేణు, తేల్ల లక్ష్మీ రమేష్, చాడగొండ కవిత బుచ్చిరెడ్డి, కొమురయ్య, కేఏపిపి చంద్ర, మాసం గణేష్, ఆకుల నర్మద, ఈఈ లచ్చిరెడ్డి, డీఈ ఓం ప్రకాష్, ఏఈ గట్టు స్వామి, భీంవర్దన్ రెడ్డి, ఇతర అధికారులు, సిబ్బంది పాల్గొన్నారు.
