- కౌలాలంపూర్‌ ఛాంపియన్‌షిప్‌లో మూడు స్వర్ణాలు.. ఒక రజతం కైవసం పతక విజేతలను ఘనంగా సత్కరించిన మంత్రి గడ్డం వివేక్‌ వెంకటస్వామి
హైదరాబాద్‌, అక్టోబర్‌ 24 (చైతన్యగళం): అంతర్జాతీయ యోగా ఛాంపియన్‌షిప్‌లో తెలంగాణ క్రీడాకారులు అద్భుత ప్రతిభ కనబరిచి రాష్ట్ర ఖ్యాతిని ప్రపంచవ్యాప్తంగా చాటారు. మలేషియాలోని కౌలాలంపూర్‌లో మే 15 నుంచి 19 వరకు నిర్వహించిన అంతర్జాతీయ యోగా ఛాంపియన్‌షిప్‌-2026లో తెలంగాణకు చెందిన నలుగురు క్రీడాకారులు మూడు బంగారు పతకాలు, ఒక రజత పతకం సాధించి సత్తా చాటారు. ఈ సందర్భంగా పతక విజేతలను రాష్ట్ర మంత్రి గడ్డం వివేక్‌ వెంకటస్వామి ఘనంగా సత్కరించి అభినందించారు.
ప్రపంచవ్యాప్తంగా పది దేశాలకు చెందిన ఆరు నుంచి 85 ఏళ్ల వయస్సు గల క్రీడాకారులు పాల్గొన్న ఈ పోటీల్లో తెలంగాణ యోగాకారులు తమ ప్రతిభ, క్రమశిక్షణ, అంకితభావంతో ప్రత్యేక గుర్తింపు పొందారు. వివిధ వయస్సుల విభాగాల్లో పోటీపడి పతకాలు సాధించడం విశేషం.
అంతర్జాతీయ స్థాయిలో విజయం సాధించిన క్రీడాకారులు మంత్రి గడ్డం వివేక్‌ వెంకటస్వామిని మర్యాదపూర్వకంగా కలిశారు. పోటీల్లో తమ అనుభవాలను ఆయనతో పంచుకున్నారు. ఈ సందర్భంగా మంత్రి విజేతలను శాలువాలతో సత్కరించి, వారి విజయాలను ప్రశంసించారు. తెలంగాణ ప్రతిభను ప్రపంచ వేదికపై చాటిన క్రీడాకారులు రాష్ట్రానికి గర్వకారణమని కొనియాడారు.
చిన్నారుల నుంచి వృద్ధుల వరకు అన్ని వయస్సుల వారు యోగాలో రాణించడం అభినందనీయమని మంత్రి పేర్కొన్నారు. వయస్సు విజయాలకు అడ్డంకి కాదని, పట్టుదల, క్రమశిక్షణ, నిరంతర సాధనతో ఏ వయస్సులోనైనా అసాధారణ విజయాలు సాధించవచ్చని అన్నారు. క్రీడాకారుల కృషి రాష్ట్ర యువతకు స్ఫూర్తిదాయకమని పేర్కొంటూ, యువత వీరిని ఆదర్శంగా తీసుకొని అంతర్జాతీయ స్థాయిలో ప్రతిభను చాటాలని పిలుపునిచ్చారు. భవిష్యత్తులో మరిన్ని విజయాలు సాధించేందుకు క్రీడాకారులకు ప్రభుత్వపరంగా, వ్యక్తిగతంగా తన వంతు సహకారం అందిస్తానని భరోసా ఇచ్చారు.
ఈ ఛాంపియన్‌షిప్‌లో ఆరు నుంచి పదేళ్ల వయస్సు విభాగంలో వి. సాయి రాఘవేంద్ర బంగారు పతకం సాధించగా, 15 నుంచి 22 ఏళ్ల విభాగంలో ఎం. జస్వంత్‌ కుమార్‌ స్వర్ణ పతకం కైవసం చేసుకున్నారు. ఇదే వయస్సు విభాగంలో కె. ఝాన్సీ మోహన రజత పతకం సాధించారు. 65 ఏళ్లు పైబడిన విభాగంలో కె.వి.ఎం. రెడ్డి బంగారు పతకంతో మెరిశారు.
ఒకే అంతర్జాతీయ వేదికపై వివిధ వయస్సుల క్రీడాకారులు పతకాలు సాధించడం తెలంగాణ యోగా ప్రతిభకు నిదర్శనంగా నిలిచింది. ఈ విజయాలు యోగాపై యువతతో పాటు అన్ని వయస్సుల వారిలో ఆసక్తిని పెంపొందించడంతోపాటు, మరింత మంది అంతర్జాతీయ పోటీల్లో పాల్గొనేందుకు స్ఫూర్తినిస్తాయని క్రీడాభిమానులు అభిప్రాయపడ్డారు.
