మహబూబాబాద్, జూలై 25(చైతన్యగళం): కార్గిల్ విజయ్ దివస్ను పురస్కరించుకుని మహబూబాబాద్ ప్రభుత్వ జూనియర్ కళాశాలలో శనివారం దేశభక్తి ఉట్టిపడేలా నిర్వహించిన కార్యక్రమం విద్యార్థులను విశేషంగా ఆకట్టుకుంది. కళాశాల ప్రిన్సిపాల్, అధ్యాపకులు, బోధనేతర సిబ్బంది, విద్యార్థులు కలిసి మానుకోటకు చెందిన కార్గిల్ యుద్ధ వీరులను ఘనంగా సన్మానించి వారి అపూర్వ సేవలను కొనియాడారు. శాలువాలు కప్పి, పుష్పగుచ్ఛాలు అందజేసి ఘన స్వాగతం పలికారు.
ఈ సందర్భంగా కళాశాల ప్రిన్సిపాల్ మాట్లాడుతూ, దేశ సరిహద్దులను కాపాడేందుకు తమ ప్రాణాలను సైతం పణంగా పెట్టి పోరాడిన కార్గిల్ యుద్ధ వీరుల త్యాగాలు భారత చరిత్రలో చిరస్థాయిగా నిలిచిపోతాయని అన్నారు. వారి ధైర్యసాహసాలు, దేశభక్తి ప్రతి భారతీయుడికి ఆదర్శమని, ముఖ్యంగా యువత వారిని స్ఫూర్తిగా తీసుకుని క్రమశిక్షణ, సేవాభావం, దేశభక్తిని పెంపొందించుకోవాలని సూచించారు. కార్గిల్ విజయ్ దివస్ అనేది కేవలం ఒక వేడుక మాత్రమే కాదని, దేశం కోసం ప్రాణత్యాగం చేసిన అమర జవాన్లను స్మరించుకుంటూ వారి త్యాగాలకు నివాళులర్పించే గౌరవప్రదమైన దినమని పేర్కొన్నారు.
అనంతరం కార్గిల్ యుద్ధ వీరులు విద్యార్థులతో తమ యుద్ధ అనుభవాలను పంచుకున్నారు. కార్గిల్ యుద్ధ సమయంలో ఎదురైన క్లిష్ట పరిస్థితులు, సరిహద్దుల్లో సైనికులు ఎదుర్కొనే సవాళ్లు, దేశ రక్షణలో సైనికుల కర్తవ్య నిబద్ధత, త్యాగం, క్రమశిక్షణ గురించి వివరించారు. సైన్యంలో సేవ చేయడం అత్యున్నత దేశసేవ అని పేర్కొంటూ విద్యార్థుల్లో దేశభక్తి భావనను పెంపొందించేలా ప్రసంగించారు.
విద్యార్థులను ఉద్దేశించి వారు మాట్లాడుతూ, ఇంటర్మీడియట్ విద్య పూర్తయిన అనంతరం భారత సైన్యంలో చేరేందుకు అనేక అవకాశాలు ఉన్నాయని చెప్పారు. ముఖ్యంగా అగ్నివీర్ పథకం ద్వారా సైన్యంలో చేరి నాలుగు సంవత్సరాలు దేశానికి సేవలందించవచ్చని వివరించారు. ఆ సేవా కాలంలో పొందే శిక్షణ, క్రమశిక్షణ, నాయకత్వ లక్షణాలు భవిష్యత్తులో పోలీసు, పారామిలిటరీ, ఇతర ప్రభుత్వ ఉద్యోగాలతో పాటు సివిల్ సర్వీసెస్ (ఐఏఎస్, ఐపీఎస్) వంటి అత్యున్నత లక్ష్యాలను సాధించడానికీ ఎంతో ఉపయోగపడతాయని తెలిపారు. సైన్యంలో చేరాలనే ఆసక్తి ఉన్న తమ పిల్లలను తల్లిదండ్రులు నిరుత్సాహపరచకుండా ప్రోత్సహించాలని, దేశసేవకు అవకాశం లభిస్తే అది ప్రతి కుటుంబానికి గర్వకారణమని అన్నారు.
కార్యక్రమంలో విద్యార్థులు దేశభక్తి నినాదాలతో యుద్ధ వీరులకు ఘనంగా అభివాదం చేశారు. అనంతరం కళాశాల కుటుంబం కార్గిల్ యుద్ధ వీరులకు కృతజ్ఞతలు తెలుపుతూ, వారి సేవలకు అభినందనలు తెలియజేసింది. కార్యక్రమం దేశభక్తి వాతావరణంలో ముగియగా, విద్యార్థుల్లో సైన్యంలో చేరాలనే స్పూర్తిని నింపింది.
