- కరీంనగర్‌లో గీతాభవన్‌ చౌరస్తా వద్ద ఆందోళన.. బీజేపీ జిల్లా అధ్యక్షుడు సాయిని మల్లేశం
కరీంనగర్ టౌన్‌, అక్టోబర్ 26 (చైతన్యగళం): ప్రధానమంత్రి నరేంద్ర మోదీపై కాంగ్రెస్‌ అధ్యక్షుడు మల్లికార్జున ఖర్గే చేసినట్లు పేర్కొంటున్న వ్యాఖ్యలను ఖండిస్తూ బీజేపీ నాయకులు సోమవారం కరీంనగర్‌లో నిరసన కార్యక్రమం నిర్వహించారు. బీజేపీ జిల్లా అధ్యక్షుడు సాయిని మల్లేశం ఆధ్వర్యంలో పట్టణంలోని గీతాభవన్‌ చౌరస్తా వద్ద ఈ ఆందోళన చేపట్టారు.
ఈ సందర్భంగా సాయిని మల్లేశం మాట్లాడుతూ ప్రధానమంత్రి నరేంద్ర మోదీపై కాంగ్రెస్‌ నాయకులు వ్యక్తిగత విమర్శలు చేయడం తగదని అన్నారు. రాజకీయాల్లో విమర్శలు విధానాలు, ప్రజా సమస్యల ఆధారంగా ఉండాలే తప్ప వ్యక్తిగత దూషణలకు, కుటుంబ సభ్యులను కించపరిచే వ్యాఖ్యలకు తావుండకూడదని పేర్కొన్నారు. ప్రధానమంత్రి, ఆయన కుటుంబ సభ్యులపై చేసినట్లు చెబుతున్న వ్యాఖ్యలను తమ పార్టీ తీవ్రంగా ఖండిస్తోందన్నారు. ఇలాంటి వ్యాఖ్యలను కాంగ్రెస్‌ నాయకులు విరమించుకోవాలని, లేనిపక్షంలో ప్రజాస్వామ్యబద్ధంగా మరిన్ని నిరసన కార్యక్రమాలు చేపడతామని హెచ్చరించారు.
ఈ కార్యక్రమంలో బీజేపీ జిల్లా ప్రధాన కార్యదర్శులు మాడ వెంకట్‌రెడ్డి, గుజ్జ శ్రీనివాసరావు, కనుమల్ల గణపతి, రాష్ట్ర కార్యవర్గ సభ్యుడు ఇనుకొండ నాగేశ్వర్‌రెడ్డి, జిల్లా ఉపాధ్యక్షులు ఎర్రబెల్లి సంపత్‌రావు, సీహెచ్‌ నరసింహరాజు, దురిశెట్టి సంపత్‌, గాజుల సప్నతో పాటు జిల్లా కార్యదర్శులు, కార్పొరేటర్లు, వివిధ మోర్చాల నాయకులు, సీనియర్‌ నాయకులు, పార్టీ కార్యకర్తలు పాల్గొన్నారు.
