దేశ భవిష్యత్తుకు పునాది కావాల్సిన యువతలో మద్యం వినియోగం పెరుగుతుండటం సమాజాన్ని తీవ్రంగా కలవరపెడుతోంది. కలలు కనాల్సిన వయస్సులో, లక్ష్యాలను చేరుకోవాల్సిన దశలో కొందరు యువకులు మద్యం వ్యసనానికి బానిసలై తమ జీవితాలను ప్రమాదంలోకి నెట్టుకుంటున్నారు. ఒకప్పుడు పెద్దలకే పరిమితమైన మద్యం అలవాటు, నేడు యువతలో ఫ్యాషన్గా, సామాజిక హోదాకు గుర్తుగా మారడం ఆందోళనకర పరిణామం.
స్నేహితుల ప్రభావం, సామాజిక మాధ్యమాల్లో కనిపించే తప్పుడు ప్రచారం, సినిమాల్లో మద్యం సేవనాన్ని గొప్పగా చూపించడం, నిరుద్యోగం, మానసిక ఒత్తిడి వంటి అనేక కారణాలు యువతను మద్యం వైపు ఆకర్షిస్తున్నాయి. సరదాగా మొదలైన అలవాటు క్రమంగా వ్యసనంగా మారి ఆరోగ్యాన్ని, ఆర్థిక పరిస్థితిని, కుటుంబ బంధాలను దెబ్బతీస్తోంది. కాలేయ వ్యాధులు, గుండె సంబంధిత సమస్యలు, మానసిక ఆందోళనలు వంటి అనేక ఆరోగ్య సమస్యలకు మద్యం కారణమవుతోంది.
మద్యం మత్తులో వాహనాలు నడపడం వల్ల రోడ్డు ప్రమాదాలు రోజురోజుకూ పెరుగుతున్నాయి. ఎన్నో కుటుంబాలు తమ పిల్లలను కోల్పోతుండగా, మరెందరో యువకులు శాశ్వత వికలాంగులుగా మారుతున్నారు. అంతేకాకుండా కుటుంబ కలహాలు, నేరాలు, హింసాత్మక ఘటనలు, సామాజిక అస్థిరతకు కూడా మద్యం ప్రధాన కారణంగా మారుతోంది. ఒక వ్యక్తి మద్యం వ్యసనానికి బానిసైతే దాని ప్రభావం అతనిపైనే కాకుండా కుటుంబం, సమాజంపైనా పడుతోంది.
ఈ పరిస్థితిని మార్చేందుకు తల్లిదండ్రులు పిల్లలపై మరింత శ్రద్ధ వహించాల్సిన అవసరం ఉంది. విద్యాసంస్థల్లో మద్యం దుష్ప్రభావాలపై అవగాహన కార్యక్రమాలను విస్తృతంగా నిర్వహించాలి. యువతలో ఆత్మవిశ్వాసాన్ని పెంపొందించే క్రీడలు, సాంస్కృతిక కార్యక్రమాలు, వ్యక్తిత్వ వికాస శిక్షణలు ప్రోత్సహించాలి. ప్రభుత్వం అక్రమ మద్యం విక్రయాలపై కఠిన చర్యలు తీసుకోవడంతో పాటు యువతకు ఉపాధి అవకాశాలు కల్పించే దిశగా చర్యలు చేపట్టాలి.
యువత దేశానికి వెన్నెముక. వారి శక్తి, ప్రతిభ, సృజనాత్మకత దేశాభివృద్ధికి వినియోగపడాలి గానీ మత్తుకు బలికాకూడదు. ప్రతి యువకుడు తన జీవిత లక్ష్యాన్ని గుర్తించి, కుటుంబ ఆశయాలను నెరవేర్చే దిశగా అడుగులు వేయాలి. మద్యం క్షణిక ఆనందాన్ని ఇవ్వొచ్చు, కానీ జీవితాంతం బాధను మిగులుస్తుంది.
యువత ఇకనైనా మేల్కొనాలి. మద్యం వ్యసనానికి దూరంగా ఉండాలి. మన జీవితాలు, మన కుటుంబాల భవిష్యత్తు మన చేతుల్లోనే ఉంది. మనం మారితే సమాజం మారుతుంది. మనతో పాటు మన చుట్టూ ఉన్నవారినీ చైతన్యవంతులను చేయాలి.
మత్తుకు దూరంగా ఉండండి… జీవితాన్ని గెలుచుకోండి.
మద్యం మానితే ఆరోగ్యం, ఆనందం మీ సొంతం.
యువశక్తి దేశాభివృద్ధికి ఉపయోగపడాలి… మత్తుకు కాదు.
– కాశవేణి రాకేష్
నీలగిరి ఎక్స్ప్రెస్, హుస్నాబాద్ నియోజకవర్గం ఇన్చార్జి
