- వివిధ ప్రాంతాల నుంచి తరలివచ్చి గానంతో అలరించిన గాయకులు
- మహబూబాబాద్‌ గాయకుడు రేణుకుంట్ల లక్ష్మీకాంతారావుకు ఘన సన్మానం
ఖమ్మం(చైతన్యగళం): శ్రీ భక్త రామదాసు స్టేజి ఆర్టిస్ట్‌ అసోసియేషన్‌ ఆధ్వర్యంలో నిర్వహించిన సినిమా పాటల పోటీలు విజయవంతంగా ముగిశాయి. ఖమ్మం పట్టణంలోని అతిథి హోటల్‌లో సంస్థ అధ్యక్షుడు రాగమయి రమేష్‌ ఆధ్వర్యంలో ఈ కార్యక్రమం నిర్వహించారు.
ఖమ్మం, హైదరాబాద్‌, కోదాడ, కల్లూరు, ముదిగొండ, ఎర్రుపాలెం, సూర్యాపేట, మహబూబాబాద్‌ తదితర ప్రాంతాల నుంచి గాయకులు ఉత్సాహంగా పాల్గొన్నారు. వివిధ చిత్రాల్లోని మధురమైన గీతాలను ఆలపిస్తూ తమ గాన ప్రతిభను చాటుకున్నారు. ఒక్కొక్కరు తమ స్వర మాధుర్యంతో ప్రేక్షకులను ఆకట్టుకోవడంతో కార్యక్రమం ఆద్యంతం సంగీత సందడితో సాగింది.
పోటీలకు కొమ్ము రమేష్‌ న్యాయనిర్ణేతగా వ్యవహరించి గాయకుల ప్రతిభను పరిశీలించారు. మహబూబాబాద్‌కు చెందిన ప్రముఖ గాయకుడు రేణుకుంట్ల లక్ష్మీకాంతారావు ఆలపించిన పాటలు ప్రేక్షకులను విశేషంగా ఆకట్టుకున్నాయి. ఆయన గాన ప్రతిభను అభినందించిన నిర్వాహకులు ప్రశంసాపత్రం అందజేసి ఘనంగా సత్కరించారు.
ఈ సందర్భంగా లక్ష్మీకాంతారావు మాట్లాడుతూ సంగీతం మానసిక ప్రశాంతతను అందించడంతోపాటు వివిధ ప్రాంతాల కళాకారులను ఒకే వేదికపైకి తీసుకువచ్చే గొప్ప మాధ్యమమని అన్నారు. ఇలాంటి పోటీలు నిర్వహించడం వల్ల కళాకారుల్లోని ప్రతిభ వెలుగులోకి వస్తుందని, గాయకులకు తమ నైపుణ్యాన్ని ప్రదర్శించే అవకాశం లభిస్తుందని పేర్కొన్నారు. కళాకారులను ప్రోత్సహిస్తూ కార్యక్రమాన్ని నిర్వహించిన అసోసియేషన్‌ అధ్యక్షుడు రాగమయి రమేష్‌, నిర్వాహకులకు కృతజ్ఞతలు తెలిపారు.
కార్యక్రమానికి సాయి శ్రీ డెవలపర్స్‌ అధినేత కమర్తపు శ్రీధర్‌, ఆధ్యాత్మిక గురువు డాక్టర్‌ సెలువోజు చంద్రమౌళి తదితరులు హాజరయ్యారు. గాయకుల పాటలను ఆసక్తిగా విన్న వారు కళాకారుల ప్రతిభను ప్రశంసించారు. ఇలాంటి సాంస్కృతిక కార్యక్రమాలను మరిన్ని నిర్వహించాలని నిర్వాహకులను అభినందించారు.