- క్షేత్రస్థాయి సమస్యలను ఎప్పటికప్పుడు పరిష్కరించాలి: కలెక్టర్‌ చిత్రా మిశ్రా
కరీంనగర్‌, అక్టోబర్‌ 23 (చైతన్యగళం):
రాష్ట్ర ప్రభుత్వం ప్రతిష్ఠాత్మకంగా చేపట్టిన భూముల రీ సర్వే ప్రక్రియను నిర్దేశిత లక్ష్యాలకు అనుగుణంగా వేగవంతం చేయాలని కరీంనగర్‌ జిల్లా కలెక్టర్‌ చిత్రా మిశ్రా అధికారులను ఆదేశించారు. జిల్లాలో 70 గ్రామాల్లో రీ సర్వే నిర్వహించాలని లక్ష్యంగా నిర్దేశించగా, ఇప్పటివరకు 10 గ్రామాల్లో ప్రక్రియ పూర్తయిందని తెలిపారు. మిగిలిన గ్రామాల్లోనూ ప్రణాళికాబద్ధంగా సర్వే పనులను పూర్తి చేయాలని సూచించారు. జిల్లాలో అందుబాటులో ఉన్న 30 రోవర్లను సమర్థంగా వినియోగించి పనుల్లో వేగం పెంచాలని స్పష్టం చేశారు.
జిల్లా కలెక్టర్‌ క్యాంపు కార్యాలయంలో శుక్రవారం రాత్రి భూముల రీ సర్వే పురోగతి, క్షేత్రస్థాయిలో ఎదురవుతున్న సమస్యలు, భూముల రికార్డుల పరిశీలన, సర్వే–రెవెన్యూ శాఖల సమన్వయం, ఆర్డీవోల పర్యవేక్షణ తదితర అంశాలపై అదనపు కలెక్టర్‌ (రెవెన్యూ) శ్రీనివాస్‌రెడ్డి, ఆర్డీవోలు, తహసీల్దార్లతో కలెక్టర్‌ సమీక్ష నిర్వహించారు. ఇప్పటివరకు పూర్తయిన సర్వే వివరాలను పరిశీలించి, మిగిలిన గ్రామాల్లో నిర్దేశిత లక్ష్యాలను చేరుకునేందుకు అవసరమైన చర్యలు తీసుకోవాలని అధికారులకు సూచించారు.
సర్వే, రెవెన్యూ శాఖల అధికారులు పరస్పర సమన్వయంతో పనిచేయాలని కలెక్టర్‌ ఆదేశించారు. మండల స్థాయిలో సర్వే అధికారులు, లైసెన్స్‌డ్‌ సర్వేయర్లు, మండల సర్వేయర్లు నిరంతరం సంప్రదింపులు జరుపుతూ సర్వేలో జాప్యం జరగకుండా చూడాలన్నారు. భూముల రికార్డుల పరిశీలనలో స్పష్టతతో వ్యవహరించాలని, క్షేత్రస్థాయిలో ఎదురయ్యే సమస్యలను గుర్తించి ఎప్పటికప్పుడు పరిష్కరించాలని స్పష్టం చేశారు.
రీ సర్వే చేపట్టనున్న గ్రామాల్లో రైతులకు ముందుగానే సమాచారం అందించాలని కలెక్టర్‌ సూచించారు. వ్యవసాయ శాఖ అధికారులు రైతులతో సమన్వయం చేసుకుంటూ వారిని సర్వే ప్రక్రియలో భాగస్వాములను చేయాలని తెలిపారు. రీ సర్వే ఉద్దేశం, నిర్వహించే విధానం గురించి రైతులకు అవగాహన కల్పించి, వారి సహకారంతో ప్రక్రియను పారదర్శకంగా, సజావుగా పూర్తి చేయాలని ఆదేశించారు.
రీ సర్వేలో కీలకంగా వ్యవహరిస్తున్న లైసెన్స్‌డ్‌ సర్వేయర్లకు చెల్లింపులు ఎప్పటికప్పుడు చేస్తున్నట్లు కలెక్టర్‌ తెలిపారు. సర్వే పనులకు ఎలాంటి ఆటంకాలు కలగకుండా అవసరమైన చర్యలు తీసుకోవాలన్నారు. ఆర్డీవోలు, తహసీల్దార్లు మండలాల వారీగా పురోగతిని నిరంతరం పర్యవేక్షిస్తూ నిర్దేశిత లక్ష్యాలను సాధించాలని సూచించారు.
ఈ సమీక్షలో అదనపు కలెక్టర్‌ (రెవెన్యూ) శ్రీనివాస్‌రెడ్డి, జిల్లా రెవెన్యూ అధికారి స్వామి, ఆర్డీవోలు షర్మిల, జలకుమారి, ఏడీ సర్వే అండ్‌ ల్యాండ్‌ రికార్డ్స్‌ కిషన్‌రావు, తహసీల్దార్లు, ఇతర సంబంధిత అధికారులు పాల్గొన్నారు.