- మరిపెడ మండలానికి రాష్ట్రస్థాయి గుర్తింపు
మహబూబాబాద్ జిల్లా, అక్టోబర్ 17 (చైతన్యగళం):
నల్గొండలోని జీఎం కన్వెన్షన్ హాల్‌లో నిర్వహించిన సమావేశంలో మహబూబాబాద్ జిల్లా మరిపెడ మండలానికి చెందిన గుగులోతు శ్రీధర్ పీఆర్టీయూ రాష్ట్ర ఉపాధ్యక్షుడిగా ఏకగ్రీవంగా ఎన్నికయ్యారు. ఆయనకు రాష్ట్రస్థాయి బాధ్యతలు దక్కడం పట్ల మరిపెడ మండల పీఆర్టీయూ నాయకులు, సభ్యులు హర్షం వ్యక్తం చేశారు. ఈ ఎన్నికతో మరిపెడ మండలానికి రాష్ట్రస్థాయిలో గుర్తింపు లభించిందని పలువురు పేర్కొన్నారు.
సంఘం బలోపేతానికి కృషి చేస్తా
రాష్ట్ర ఉపాధ్యక్షుడిగా తనను ఏకగ్రీవంగా ఎన్నుకున్న సంఘం నాయకులకు, సభ్యులకు గుగులోతు శ్రీధర్ కృతజ్ఞతలు తెలిపారు. తన ఎన్నికకు సహకరించిన కీసర రమేష్ రెడ్డికి, సంఘం ప్రధాన కార్యదర్శి లింగాల మహేష్‌కు ప్రత్యేక ధన్యవాదాలు తెలియజేశారు. తనకు మద్దతుగా నిలిచిన మరిపెడ మండల పీఆర్టీయూ సభ్యులందరికీ పేరుపేరునా కృతజ్ఞతలు తెలిపారు.
సంఘం తనపై ఉంచిన నమ్మకాన్ని నిలబెట్టుకుంటూ ఉపాధ్యాయుల సమస్యల పరిష్కారానికి కృషి చేస్తానని శ్రీధర్ పేర్కొన్నారు. ఉపాధ్యాయుల హక్కుల పరిరక్షణ, సంక్షేమం, వృత్తిపరమైన సమస్యల పరిష్కారానికి సంఘం నాయకులు, సభ్యుల సహకారంతో ముందుకు సాగుతానని తెలిపారు. తనకు అప్పగించిన రాష్ట్రస్థాయి బాధ్యతలను సమర్థవంతంగా నిర్వహిస్తూ సంఘం బలోపేతానికి కృషి చేస్తానని స్పష్టం చేశారు.
శ్రీధర్‌కు అభినందనలు
గుగులోతు శ్రీధర్ రాష్ట్ర ఉపాధ్యక్షుడిగా ఏకగ్రీవంగా ఎన్నిక కావడంపై మరిపెడ మండల పీఆర్టీయూ నాయకులు, సభ్యులు అభినందనలు తెలిపారు. భవిష్యత్తులో ఆయన మరిన్ని ఉన్నత బాధ్యతలు చేపట్టి ఉపాధ్యాయుల హక్కుల పరిరక్షణకు, సంక్షేమానికి మరింత సేవలందించాలని ఆకాంక్షించారు.