- అసంపూర్తి పనులను వెంటనే పూర్తి చేయాలి: కలెక్టర్‌ చిత్రా మిశ్రా
- తొమ్మిది కాలనీల్లో వసతులపై క్షేత్రస్థాయి పరిశీలనకు ఆదేశం
కరీంనగర్‌, అక్టోబర్‌ 13 (చైతన్యగళం):
జిల్లాలోని డబుల్‌ బెడ్‌రూమ్‌ ఇళ్ల కాలనీల్లో అన్ని మౌలిక వసతులు కల్పించి, అసంపూర్తిగా ఉన్న పనులను త్వరితగతిన పూర్తి చేయాలని జిల్లా కలెక్టర్‌ చిత్రా మిశ్రా అధికారులను ఆదేశించారు. లబ్ధిదారులకు ఇళ్లను అందించేందుకు అవసరమైన ఏర్పాట్లు పూర్తిచేయాలని స్పష్టం చేశారు.
మంగళవారం రాత్రి జిల్లా సమీకృత కార్యాలయాల సముదాయంలో గృహ నిర్మాణ శాఖ అధికారులతో డబుల్‌ బెడ్‌రూమ్‌ ఇళ్ల నిర్మాణం, మౌలిక వసతుల కల్పనపై కలెక్టర్‌ సమీక్ష నిర్వహించారు. ఈ సందర్భంగా జిల్లాలో పూర్తయిన తొమ్మిది డబుల్‌ బెడ్‌రూమ్‌ ఇళ్ల కాలనీల్లో అందుబాటులో ఉన్న సౌకర్యాలను మరోసారి క్షేత్రస్థాయిలో సమగ్రంగా పరిశీలించాలని సూచించారు.
కాలనీల్లో తాగునీటి సరఫరా, విద్యుత్తు కనెక్షన్లు, మురుగునీటి కాలువలు, వీధి దీపాలు, కాలనీలకు చేరుకునే రహదారులు సక్రమంగా ఉన్నాయో లేదో తనిఖీ చేయాలని ఆదేశించారు. ఎక్కడైనా లోటుపాట్లు ఉంటే వెంటనే సరిచేసి, అవసరమైన వసతులను కల్పించాలని పేర్కొన్నారు.
11 కాలనీల్లో పెండింగ్‌ పనులపై దృష్టి
జిల్లాలోని 11 డబుల్‌ బెడ్‌రూమ్‌ ఇళ్ల కాలనీల్లో అసంపూర్తిగా ఉన్న పనులను గుర్తించి, వాటిని త్వరితగతిన పూర్తి చేయాలని కలెక్టర్‌ ఆదేశించారు. కాలనీల్లో అవసరమైన అన్ని సదుపాయాలు కల్పించి, ఇళ్లను లబ్ధిదారులకు అందించేందుకు సిద్ధం చేయాలని స్పష్టం చేశారు.
ఇందిరమ్మ ఇళ్ల రెండో విడత ప్రక్రియ వేగవంతం చేయాలి
ఇందిరమ్మ ఇళ్ల పథకానికి సంబంధించి రెండో విడత ప్రక్రియను వేగవంతం చేయాలని అధికారులకు సూచించారు. అర్హులైన లబ్ధిదారులకు పథకం ద్వారా ప్రయోజనం చేకూరేలా సంబంధిత శాఖల అధికారులు సమన్వయంతో పనిచేయాలని ఆదేశించారు.
ఈ సమావేశంలో అదనపు కలెక్టర్‌ (రెవెన్యూ) శ్రీనివాస్‌రెడ్డి, జిల్లా రెవెన్యూ అధికారి స్వామి, ఇన్‌చార్జి జిల్లా ముఖ్య ప్రణాళిక అధికారి వి. కిషన్‌రావు, గృహ నిర్మాణ శాఖ అధికారులు తదితరులు పాల్గొన్నారు.