- ఎస్‌ఐఆర్‌, ప్రధాన ఎన్నికల కమిషనర్‌ అంశాలు కోర్టు పరిధిలోనే.. న్యాయపరంగా ఆశ్రయించవచ్చని స్పష్టీకరణ
ఢిల్లీ(చైతన్యగళం): ఓటర్ల జాబితాల ప్రత్యేక విస్తృత సవరణ (ఎస్‌ఐఆర్‌), ప్రధాన ఎన్నికల కమిషనర్‌ జ్ఞానేశ్‌ కుమార్‌కు సంబంధించిన అంశాలపై చర్చించేందుకు లోక్‌సభలో ప్రతిపక్ష నాయకుడు రాహుల్‌ గాంధీ, కాంగ్రెస్‌ అధ్యక్షుడు మల్లికార్జున ఖర్గే కోరిన భేటీకి సుప్రీంకోర్టు ప్రధాన న్యాయమూర్తి జస్టిస్‌ సూర్యకాంత్‌ నిరాకరించినట్లు సమాచారం. ఈ అంశాలు ఇప్పటికే న్యాయస్థానంలో విచారణలో ఉన్నందున ప్రత్యేకంగా సమావేశం నిర్వహించడం సముచితం కాదని సీజేఐ కార్యాలయం ఈమెయిల్‌ ద్వారా తెలిపినట్లు సంబంధిత వర్గాలు వెల్లడించాయి.
ప్రతిపక్షాలు లేవనెత్తాలనుకుంటున్న అంశాలపై న్యాయపరమైన మార్గంలో కోర్టును ఆశ్రయించవచ్చని సీజేఐ కార్యాలయం స్పష్టం చేసినట్లు సమాచారం. రాజ్యాంగ వ్యవస్థ ప్రకారం కార్యనిర్వాహక వ్యవస్థకు సంబంధించిన పరిపాలనా వ్యవహారాల్లో న్యాయస్థానం జోక్యం చేసుకోలేదని పేర్కొన్నట్లు తెలిసింది. అయితే, ప్రాథమిక హక్కుల పరిరక్షణ కోసం న్యాయపరమైన పరిష్కారం కోరే స్వేచ్ఛ ఉందని తెలిపినట్లు సమాచారం.
సుప్రీంకోర్టు మార్చ్‌పై ఉత్కంఠ
ఓటర్ల జాబితాల్లో అక్రమాలు జరుగుతున్నాయంటూ కాంగ్రెస్‌ సహా ప్రతిపక్ష పార్టీలు ఇప్పటికే నిరసనలు చేపడుతున్నాయి. ఈ నేపథ్యంలో ఇండియా కూటమి ఆధ్వర్యంలో ఢిల్లీలో ఆందోళనలను ఉధృతం చేయాలని ప్రతిపక్ష నేతలు నిర్ణయించినట్లు సమాచారం. కాంగ్రెస్‌ పాలిత రాష్ట్రాల ముఖ్యమంత్రులు, ఎంపీలు, కూటమి నేతలతో కలిసి సుప్రీంకోర్టు వరకు నిరసన ర్యాలీ నిర్వహించాలని ప్రణాళిక రూపొందించారు.
ఓటర్ల జాబితాల ప్రత్యేక సవరణను రద్దు చేయాలని, ప్రధాన ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలని కోరుతూ సీజేఐకి వినతిపత్రం సమర్పించనున్నట్లు రాహుల్‌ గాంధీ ప్రకటించినట్లు కథనంలో పేర్కొన్నారు. అయితే, భేటీకి నిరాకరణ నేపథ్యంలో ప్రతిపక్షాల ప్రతిపాదిత మార్చ్‌ ఎలా సాగుతుందనే అంశంపై ఉత్కంఠ నెలకొంది.
మంగళవారం ఎస్‌ఐఆర్‌ పిటిషన్ల విచారణ
ఎస్‌ఐఆర్‌ ప్రక్రియతో పాటు ఎన్నికల కమిషన్‌ నిర్ణయాలను సవాలు చేస్తూ దాఖలైన పిటిషన్లు మంగళవారం సుప్రీంకోర్టులో విచారణకు రానున్నట్లు సీజేఐ కార్యాలయం రాహుల్‌ గాంధీకి తెలిపినట్లు సమాచారం. ఇతర ఎన్నికల కమిషనర్ల అంగీకారం లేకుండా ప్రధాన ఎన్నికల కమిషనర్‌ తీసుకున్నారని ఆరోపిస్తున్న కొన్ని నిర్ణయాలపైనా పిటిషన్లు దాఖలైనట్లు కథనంలో పేర్కొన్నారు.
ఎస్‌ఐఆర్‌ ప్రక్రియ, ఎన్నికల కమిషన్‌ నిర్ణయాలపై ప్రతిపక్షాలు లేవనెత్తుతున్న అభ్యంతరాలు ఇప్పటికే న్యాయస్థానం పరిశీలనలో ఉండటంతో, వాటిపై తదుపరి పరిణామాలు సుప్రీంకోర్టు విచారణలో స్పష్టమయ్యే అవకాశం ఉంది. సీజేఐ భేటీకి నిరాకరించినప్పటికీ, ప్రతిపక్షాల నిరసన ర్యాలీపై ఆయన ఎలాంటి అభిప్రాయాన్ని వ్యక్తం చేయలేదని సుప్రీంకోర్టు వర్గాలు తెలిపినట్లు సమాచారం.