- సోషల్ మీడియా సెటైర్ నుంచి జాతీయ చర్చ దాకా.. యువత ఆగ్రహాన్ని ఇకనైనా పాలకులు అర్థం చేసుకోవాలి
ఒక చిన్న వ్యంగ్యాస్త్రం.. ఓ సోషల్ మీడియా పేజీ.. కొద్దిమంది యువకుల స్పందన.. అంతే! అనుకున్న పరిణామం కాస్తా ఉద్యమంగా మారితే? డిజిటల్ తెరలను దాటి రాజధాని వీధుల్లోకి యువత అడుగుపెడితే? అధికార వ్యవస్థను ప్రశ్నిస్తూ వేలాది గొంతులు ఒక్కటైతే? అదే ఇప్పుడు ‘కాక్రోచ్ జనతా పార్టీ’ చుట్టూ సాగుతున్న చర్చ మన ముందుంచుతున్న ప్రశ్న.
ఇది ఒక పార్టీ కథ మాత్రమే కాదు. ఇది యువతలో పేరుకుపోతున్న అసంతృప్తికి అద్దం. నిరుద్యోగం.. పోటీ పరీక్షల ఒత్తిడి.. ప్రశ్నపత్రాల లీకేజీలపై ఆందోళన.. పరీక్షల నిర్వహణలో పారదర్శకతపై సందేహాలు.. భవిష్యత్తుపై భరోసా లేకపోవడం.. ఇవన్నీ కలిసినప్పుడు యువతలో పెల్లుబికే ఆవేదన ఎలా ఉద్యమంగా మారుతుందో ఈ పరిణామాలు చాటుతున్నాయి.
వ్యంగ్యానికి ఇంత శక్తి ఎక్కడిది?
‘కాక్రోచ్’ అనే పదం మొదట నవ్వు తెప్పించవచ్చు. కానీ దాని వెనుక ఉన్న ఆవేదనను విస్మరించలేం. సోషల్ మీడియా యుగంలో వ్యంగ్యం కూడా ఒక రాజకీయ ఆయుధమే. ఒక మీమ్.. ఒక వీడియో.. ఒక నినాదం.. లక్షలాది మందిని ఒకే అంశంపై ఆలోచింపజేయగలదు.
గతంలో ఉద్యమానికి మైదానం అవసరమయ్యేది. ఇప్పుడు మొబైల్ ఫోన్ చాలు. ఒక పోస్టు వైరల్ అయితే.. అది చర్చగా మారుతుంది. చర్చ ఆగ్రహంగా మారితే.. ప్రజా ఉద్యమానికి బీజం పడుతుంది. డిజిటల్ యుగంలో అధికారానికి ఇదే కొత్త సవాలు.
విద్యార్థి ప్రశ్నకు సమాధానం చెప్పాలి
విద్యార్థి పరీక్ష రాసేది కేవలం మార్కుల కోసం కాదు.. తన భవిష్యత్తు కోసం. సంవత్సరాల పాటు పుస్తకాలతో పోరాడి, కుటుంబం నుంచి ఆశలు మోసుకుని పరీక్ష హాలులోకి వెళ్లిన యువకుడికి ప్రశ్నపత్రం లీకైందన్న వార్త ఎంతటి మానసిక దెబ్బో పాలకులు అర్థం చేసుకోవాలి.
అందుకే పరీక్షల నిర్వహణలో చిన్న లోపానికీ పెద్ద మూల్యం ఉంటుంది. ప్రశ్నపత్రాల భద్రత నుంచి ఫలితాల ప్రకటన వరకు ప్రతి దశలో పారదర్శకత ఉండాలి. తప్పు జరిగితే బాధ్యులపై కఠిన చర్యలు తీసుకోవాలి. అంతకంటే ముఖ్యంగా.. విద్యార్థుల్లో విశ్వాసాన్ని పునరుద్ధరించాలి.
లాఠీతో ఆగ్రహం ఆగదు
యువత రోడ్డెక్కినప్పుడు మొదటి స్పందన పోలీసు బలగాలు కాకుండా.. పాలనా వ్యవస్థ స్పందన కావాలి. నిరసన ప్రజాస్వామ్యంలో నేరం కాదు. హింసకు దారి తీసే చర్యలను నియంత్రించాల్సిందే. కానీ ప్రశాంతంగా ప్రశ్నించే గొంతులను వినడం కూడా అంతే అవసరం.
లాఠీచార్జీతో ఒక సభను చెదరగొట్టవచ్చు. బారికేడ్లతో ఒక ర్యాలీని ఆపవచ్చు. ఇంటర్నెట్ను నియంత్రించవచ్చు. కానీ యువత మనసులో పుట్టిన ప్రశ్నను మాత్రం ఆపలేరు.
ప్రశ్నకు సమాధానం ఇవ్వాలి.. ప్రశ్నించిన వ్యక్తిని అణచకూడదు.
జెన్-జెడ్ను తక్కువ అంచనా వేయొద్దు
ఇప్పటి యువత గత తరాల మాదిరి కాదు. ప్రపంచంలోని ప్రతి పరిణామాన్ని క్షణాల్లో తెలుసుకుంటోంది. ఒక దేశంలో జరిగిన ఘటనపై మరో దేశంలోని యువత స్పందిస్తోంది. ప్రభుత్వ నిర్ణయాలను చదువుతోంది. గణాంకాలను పరిశీలిస్తోంది. ప్రశ్నిస్తోంది.
వారిని కేవలం ఓటర్లుగా చూడటం పొరపాటు. వారు భవిష్యత్తు భారతదేశాన్ని నిర్మించబోయే పౌరులు. వారి సమస్యలు పరిష్కరించాల్సిన బాధ్యత ప్రభుత్వాలదే.
యువతకు ఉద్యోగం కావాలి. నాణ్యమైన విద్య కావాలి. పరీక్షల్లో పారదర్శకత కావాలి. తమ ప్రతిభకు తగిన అవకాశాలు కావాలి. ఇవి రాజకీయ పార్టీలకు వ్యతిరేకంగా చేసే డిమాండ్లు కావు. దేశ భవిష్యత్తు కోసం చేసే డిమాండ్లు.
ఒక్క రాజీనామాతో సమస్య పరిష్కారం కాదు
ఒక మంత్రి రాజీనామా చేశారా? ఒక ఉద్యమం విజయం సాధించిందా? అన్నదే అసలు ప్రశ్న కాదు. రాజీనామా జరిగితే అది రాజకీయ పరిణామం మాత్రమే. అసలు విజయం ఎప్పుడు వస్తుంది?
పరీక్షల వ్యవస్థ ప్రక్షాళన జరిగినప్పుడు..
ప్రశ్నపత్రాల లీకేజీలకు శాశ్వత అడ్డుకట్ట పడినప్పుడు..
నిరుద్యోగ యువతకు అవకాశాలు పెరిగినప్పుడు..
విద్యార్థుల్లో వ్యవస్థపై నమ్మకం తిరిగి వచ్చినప్పుడు..
అప్పుడే యువత పోరాటానికి నిజమైన ఫలితం లభించినట్లు.
రాజ్యాంగమే యువతకు దిక్సూచి
యువత ఆగ్రహానికి దిశ అవసరం. ఉద్యమానికి క్రమశిక్షణ అవసరం. నిరసనకు బాధ్యత అవసరం. ప్రజాస్వామ్య వ్యవస్థలను కూల్చడం కాదు.. వాటిని మరింత జవాబుదారిగా మార్చడమే యువ ఉద్యమాల లక్ష్యం కావాలి.
భావప్రకటన స్వేచ్ఛను వినియోగించాలి. కానీ అసత్య సమాచారాన్ని వ్యాప్తి చేయకూడదు. ప్రభుత్వాన్ని ప్రశ్నించాలి. కానీ వ్యక్తిగత దూషణలకు దిగకూడదు. నిరసన చేయాలి. కానీ హింసకు తావివ్వకూడదు.
రాజ్యాంగం చేతిలో ఉంటే యువత పోరాటం ప్రజాస్వామ్య శక్తిగా మారుతుంది.
ఇది ప్రభుత్వాలకు హెచ్చరిక కాదు.. మేలుకొలుపు
‘కాక్రోచ్ జనతా పార్టీ’ చుట్టూ జరిగిన పరిణామాలను కేవలం రాజకీయ వ్యతిరేకతగా కొట్టిపారేయడం సరికాదు. అందులో యువత మనోభావాల ప్రతిబింబం ఉంటే.. దాన్ని చదవాల్సిన బాధ్యత పాలకులదే.
సోషల్ మీడియాను తక్కువగా అంచనా వేసే రోజులు పోయాయి. యువతను నిశ్శబ్దంగా ఉన్న సమూహంగా భావించే రోజులు కూడా పోయాయి.
వాళ్లు చూస్తున్నారు..
వాళ్లు ఆలోచిస్తున్నారు..
వాళ్లు ప్రశ్నిస్తున్నారు..
అవసరమైతే ఒక్కటై నిలబడుతున్నారు.
అందుకే పాలకులకు ఒక స్పష్టమైన సందేశం—
యువతతో యుద్ధం చేయొద్దు.. యువతతో సంభాషించండి.
వారి గొంతును అణచొద్దు.. వారి సమస్యలను పరిష్కరించండి.
వారి ఆగ్రహాన్ని భయపడొద్దు.. ఆ ఆగ్రహానికి కారణాలను తొలగించండి.
ఎందుకంటే..
యువత దేశ భవిష్యత్తు మాత్రమే కాదు.. వర్తమానానికి కూడా దిక్సూచి!
యువ కాక్రోచ్ కథ ఇక్కడితో ముగియకూడదు.
అది పరీక్షల్లో పారదర్శకతకు.. విద్యలో సంస్కరణలకు.. ఉపాధిలో అవకాశాలకు.. జవాబుదారీ పాలనకు నాంది కావాలి.
యువత గళం వినిపించినప్పుడు ఢిల్లీ పీఠాలు కదలడం కంటే.. ఢిల్లీ పాలన స్పందించడమే ప్రజాస్వామ్య విజయానికి అసలైన కొలమానం.
వ్యాసకర్త
పెరుమాండ్ల సురేష్,
విద్యార్థి నాయకుడు