కేరళ(చైతన్యగళం): కేరళలోని పర్వత ప్రాంత జిల్లా వాయనాడ్ను కుండపోత వర్షాలు ముంచెత్తాయి. గత కొన్ని రోజులుగా ఎడతెరిపి లేకుండా కురుస్తున్న భారీ వర్షాల కారణంగా మంగళవారం తెల్లవారుజామున మేప్పాడి సమీపంలోని కల్లాడి వద్ద ఘోర ప్రమాదం సంభవించింది. వాయనాడ్ – మలప్పురం టన్నెల్ రోడ్డు ప్రాజెక్టు పనులు జరుగుతున్న మీనాక్షి బ్రిడ్జ్ పరిసరాల్లో ఒక్కసారిగా భారీ ఎత్తున కొండచరియలు విరిగిపడ్డాయి. ఈ విపత్తు సమయంలో అక్కడ నిర్మాణ పనుల్లో నిమగ్నమై ఉన్న కార్మికులు బస చేసిన తాత్కాలిక నివాసాలపై కొండశిథిలాలు, మట్టి ముద్దలు ఒక్కసారిగా దూసుకువచ్చాయి.
ఈ ప్రమాదంలో ఐదుగురు కార్మికులు తీవ్రంగా గాయపడగా, వారిని రెస్క్యూ సిబ్బంది తక్షణమే సమీపంలోని ఆసుపత్రికి తరలించారు. శిథిలాల కింద మరికొందరు కార్మికులు చిక్కుకుపోయి ఉంటారనే అనుమానంతో ఘటనా స్థలంలో ఆందోళనకర పరిస్థితులు నెలకొన్నాయి. సమాచారం అందుకున్న వెంటనే స్థానిక ప్రజలు, అగ్నిమాపక సిబ్బంది, పోలీసులు మరియు జాతీయ విపత్తు ప్రతిస్పందన దళం (NDRF) బృందాలు రంగంలోకి దిగి సహాయక చర్యలను ముమ్మరం చేశాయి. మట్టిని తొలగించి బాధితులను సురక్షితంగా బయటకు తీసేందుకు జేసీబీలతో సహాయక చర్యలు కొనసాగిస్తున్నారు.
ఈ ప్రమాదంపై కేరళ ముఖ్యమంత్రి వి.డి. సతీశన్ తీవ్ర దిగ్భ్రాంతి వ్యక్తం చేశారు. వాయనాడ్లో నెలకొన్న అత్యవసర పరిస్థితిని ఆయన ఉన్నతాధికారులతో సమీక్షించారు. మంత్రులు ఎ.పి. అనిల్ కుమార్, టి. సిద్ధిఖ్లను తక్షణమే ప్రమాద స్థలానికి చేరుకుని, సహాయక చర్యలను స్వయంగా పర్యవేక్షించాల్సిందిగా ముఖ్యమంత్రి ఆదేశించారు. బాధితులకు మెరుగైన వైద్యం అందించాలని, సహాయక చర్యల్లో ఎలాంటి ఆలస్యం జరగకూడదని స్పష్టం చేశారు.
మరోవైపు రాష్ట్రంలో వాతావరణ పరిస్థితి ఇంకా అదుపులోకి రాలేదు. రానున్న రోజుల్లో కూడా వాయనాడ్తో పాటు కేరళలోని పలు జిల్లాల్లో అత్యంత భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరిస్తూ ఎల్లో అలర్ట్ జారీ చేసింది. కొండచరియలు విరిగిపడే ప్రమాదం ఉన్న ప్రాంతాల్లో నివసించే ప్రజలు తక్షణమే సురక్షిత ప్రాంతాలకు తరలివెళ్లాలని, నదులు, వాగుల వెంబడి మరియు కొండ ప్రాంతాలలో ప్రయాణాలు పెట్టుకోవద్దని కేరళ విపత్తు నిర్వహణ సంస్థ (KSDMA) ప్రజలను అత్యవసరంగా హెచ్చరించింది.